ORANJESTAD – Conocido comerciante Ralph M. a recobra su libertad awe merdia despues cu el a keda presenta dilanti Huez Comisario. E lo mester presenta durante un tom zitting durante luna di juni proximo pa responsabilisa su mes pa su actonan pa cual e ta wordo acusa. Vocero di ministerio publico Ann Angela a confirma esaki pa noticiacla.com. E siman aki el a keda deteni pa aggression y destruccion, na momento cu el a confronta reportero Nelson “Speed’ Andrade di 24ora.com cu esaki tabata haci raportahe live dilanti cas di ex minister Otmar Oduber, cu tabata atende cu su cas di cual su cushina tabata na candela. Dado momento Oduber a pidi Andrade pa respeta su cas y no filma mas. Su tras a bin amigo di Oduber, M. unda entre Andrade cu M. a surgi un aggression. Polis a detene M., y Andrade a denuncie pa maltrato y destruccion.
ORANJESTAD – Huesnan ariba ningun manera ta influencia casonan di nan famianan. Asina corte di husticia di Aruba a raporta dialuna atardi den un comunicado. E comunicado ta referi na e publicacionnan recientemente den prensa tocante un desalohamento di un cas. E caso specifico aki ta trata ruman di un huez comisario na Aruba di fam Y. E ruman, un notario di profesion lo tabata envolvi den e caso aki di alohamiento. Segun corte, e veredictonan ariba cual e desalohamento ta basa (veredicto di e kort geding di 30 di oktober 2019 [1] y 25 di maart 2020 [2]) no a wordo pronuncia door di un familiar di un di e partidonan. “ Huesnan nunca ta trata caso di nan famianan y ariba ningun manera ta influencia casonan pendiente na Corte di nan famianan” e comunicado ta sigui bisa. “ Esaki ta salvaguardia den e codico di comportacion di huesnan, e asina jama gedragscode rechterlijke macht, cual ta publica ariba e website di Corte Comun di Husticia” e comunicado ta finalisa bisando.
ORANJESTAD – Corte a elimina practicamente tur ‘barera’ impone pa gobierno di Aruba (lesa: minister Dangui Oduber di Salud) dialuna contra e actual director di Directie Volks Gezondheid (DVG) Jerry Staring. Den un sentencia di 14 pagina,e huez ta declara 4 di 5 decision di minister como rechasa, kitando tur posibel ‘limitacion’ pa e director. Abogado di Staring, David Kock di bufete DKLegal a confirma esaki dialuna mainta. Segun Kock, cualkier ‘limitacion’ na Staring awor mester keda elimina.
ORANJESTAD – Ciudadanonan di Aruba, sea ta esnan cu a keda contagia cu e coronavirus COVID-19, of familiarnan afecta pa nan contagio, y doñonan di negoshi afecta pa e virus aki, awor tin caminda di cana legalmente localmente y haci un demanda pa recobra gastonan perdi a consecuencia di e pandemia aki. Un fundacion cu e meta pa demanda na nomber di e grupo menciona, Mega Corona Compensation Foundation (“MCCF”), ta e demandante den un demanda colectivo a base di art 3: 305ª di nos Codigo Civil. Pa medio di e fundacion aki, esnan afecta awor por demanda e partido responsabel segun e fundacion, esta China, cu ta esun cu segun nan, a causa e situacion dramatico aki y pa cual e fundacion menciona ta ten’e responsabel. E fundacion a crea un portal (website) via cual esnan afecta localmente, por registra y haya nan caso atendi. Localmente e bufete di abogadonan Gabri de Hoogd y Diana Emerencia ta representa e fundacion menciona. Lesa e articulo completo AKI.
ORANJESTAD – Personanan cu durante Toque de Queda (TDQ) ta lanta contra polis, lo wordo deteni, y keda deteni. Asina fiscal Yolanda Pronk a bisa durante briefing di coronavirus durante fin di siman. Y cu deteni, no kier men cu ta detene e persona y lague liber ora cu e TDQ caba mainta, sino mas bien ta keda deteni. Por considera esaki como zero tolerancia di ministerio publico segun Pronk. E persona ta haya un asina yama ‘dagvaarding’, osea un citacion pa presenta na corte.
ORANJESTAD – Mayoria di e grupo di 355 persona cu a keda deteni durante e periodo di Toque de Queda, ainda no a paga nan multa. Asina fiscal Yolanda Pronk a bisa durante e briefing riba coronavirus diamars anochi. Ta trata di un grupo di 305 persona cu no a haci ningun pago. E grupo aki ta haya 2 siman pa paga, sino nan caso ta bay dilanti. Un grupo di 13 persona so a paga e multa completo y 34 a haya areglo di pago.
ORANJESTAD – E multanan cu Aruba ta duna relaciona cu Toque de Queda y Shelter in Place, ta mucho mas halto cu esun na Corsou. Diabierna ministerio publico di Aruba a publica e lista di multanan, pa unda cu por mira e diferencia claramente. Pa ilustra algun, na Aruba, violacion di toque de queda ta entre 1000/1250 florin pa persona. Na Corsou esaki ta 750 florin. Esun mas interesante ta e negoshi cu mester ta cera y wordo haya habri. Na Aruba e multa pa un negoshi cu tin entre 6 pa 25 trahado, e multa ta 3000 florin y pa mas di 25 hende, 5000 florin. Na Corsou entre 6-25 trahado ta 1000 florin y mas cu 25 ta 2000 florin. Wak e lista di Aruba AKI, y esun di Corsou AKI.