ORANJESTAD (AAN): Organizacion Mundial di Salud (OMS) a actualiza nan “pregunta y contesta riba coronavirus” riba nan website, y a inclui dificultad pa papia of move como sintomanan nobo relaciona cu COVID-19.
E dos sintoma a wordo agrega na e lista di sintomanan conoci caba, manera keintura, tosamento seco, cansancio, dificultad pa hala rosea y presion riba pecho, como tambe congestion nasal, dolor di cabez, conhuntivitis, diarea, perdida di holor y smaak, rash of cambionan di color di dedenan di man y pianan.
Segun Nacionnan Uni, 80 porciento di persona cu ta sufri di COVID-19 ta recupera sin necesidad di bay hospital, apesar cu un di cada cinco ta bira grave y mester wordo interna den cuido intensivo, specialmente esnan cu ta sufri di hipertension arterial, problemanan cardiaco of pulmonar, diabetes of cancer.
No obstante, OMS ta recorda cu “cualkier persona” por contagia cu e virus y bira “gravemente malo”, pesey nan ta enfatiza riba necesidad cu si un persona haya keintura of tosamento y, ademas, hala rosea cu dificultad, sinti dolor of presion na pecho of tin dificultad pa papia of move, busca atencion medico inmediatamente.
Si ta posible, OMS a agrega, ta recomenda pa atene na reglanan di cada pais y usa un mondkapje. Mantene por lo menos un meter di distancia di otro personanan y no mishi cu superficienan cu nan mannan.
Mantene higiena den tur momento door di laba mannan y no mishi cu bo cara. Usa hand sanitizer, si laba mannan no ta posible, OMS a conseha.